News

جماعت اسلامی ہند تلنگانہ کی جانب سے ریاست کے ہو نہار مسلم طلبہ کو فیلوشپ

جماعت اسلامی ہند حلقہ تلنگانہ کے شعبہ ایچ آر ڈی کے تحت بروز اتوار دفتر حلقہ لکڑ کوٹ، حیدرآباد پر منعقد شده پروگرام میں ڈاکٹر محمد خالد مبشر الظفر ، امیر حلقہ جماعت اسلامی ہند تلنگانہ نے ریاست کے ہو نہار مسلم طلبہ کو فیلوشپ سے نوازا۔ مولانا عبدالباسط انور فیلوشپ برائے اعلیٰ تعلیم سال 2024 کے مستفید کنندگان سے خطاب کرتے ہوئے امیر حلقہ جماعت اسلامی ہند تلنگانہ نے طلباء سے کہا کہ اپنی صلاحیتوں کو نکھاریں اور اپنے اپنے شعبوں میں رہنما یا نہ کردار ادا کریں۔ مزید انہوں نے اس بات پر زور دیا کہ طلباء اپنی کامیابیوں اور خدمات کے ذریعہ نہ صرف ملت بلکہ قوم کی ترقی کو بھی آگے بڑھائیں۔

ڈاکٹر ایس ایم فصیح اللہ ، ڈائریکٹر ایچ آر ڈی، نے اس اجلاس میں کامیاب زندگی کے بنیادی اصولوں پر روشنی ڈالی۔ انہوں نے نظم و ضبط اور مقصد پر مبنی سونچ کو کامیابی کے بنیادی ستون قرار دیا۔ مزید برآں، انہوں نے روحانی اور دنیاوی معاملات کے درمیان توازن کو برقرار رکھنے کی اہمیت پر زور دیا۔ فیلوشپ انچارج جناب ایم جی اظہر نے کہا کہ یہ فیلوشپ طلبہ کی مستقل تعلیمی کار کردگی کا اعتراف ہے۔ اس تقریب میں 50 سے زائد منتخب طلباء نے شرکت کی۔ اس موقع پر SIO کے رکن جناب ہدایت اللہ نے پروگرام کی نظامت کی۔

جہد کاروں کا ایک روزہ تربیتی پروگرام

جماعت اسلامی ہند حلقہ تلنگانہ کی جانب سے مدینہ ایجوکیشنل سینٹر نامپلی حیدراباد، پر ایک روزہ سوشل ایکٹیوسٹ ٹریننگ اینڈ اورینٹیشن پروگرام منعقد کیا گیا۔ پروگرام کا آغاز تلاوت قرآن پاک سے ہوا، جناب عبدالمجید شعیب معاون امیر حلقہ نے مہمان مقررین کا تفصیلی تعارف پیش کیا۔ جناب کنی گنٹی روی تلنگانہ پیپلز جوائنٹ ایکشن کمیٹی کے، کو – کنوینر نے گفتگو کرتے ہوئے کہا کہ اس وقت ہندوستانی سماج کو آر۔ ایس۔ ایس۔ آئیڈیالوجی سے بڑے چیلنجس کا سامنا ہے اور بالخصوص مسلم، کرسچن اور کمیونسٹوں کو سماج کا دشمن قرار دیتے ہوئے انہیں دیوار سے لگایا جا رہا ہے، ایسی صورت میں سماج کے ہر فرد کی ذمہ داری ہے وہ اس جال سے نکلے، اس وقت سماج کی صورت حال یہ ہے کہ ہر کوئی اپنی انفرادی زندگی میں مگن ہے، اجتماعی معاملات و مسائل پر توجہ نہیں ہے، ہمیں اپنی زندگی سے اوپر اٹھ کر اجتماعی مسائل کو حل کرنے کے لیے آگے بڑھنے چاہیے۔ روی صاحب نے مزید کہا کہ ایک سماجی جہد کار کے لیے لازمی ہے کہ وہ اپنے گھر یا گاؤں سے کام شروع کرے۔ ایک استفسار کا جواب دیتے ہوئے انہوں نے کہا کہ فی الحال سماج میں موجود تقریباً تمام تنظیمیں اور سیاسی جماعتیں زعفرانی رنگ میں رنگ چکی ہیں۔
کولا سرسوتی، ڈاکومنٹری فلم رائٹر نے سامعین کو مخاطب کرتے ہوئے کہا کہ شہر سے اچھا گاؤں ہیں، انہوں نے اس بات پر زور دیتے ہوئے کہا کہ ہر سماجی جہد کار کے لیے لازمی ہے کہ وہ بھلے ہی ایڈوکیٹ نہ بنیں لیکن “قانون” کو ضرور پڑھنا چاہیے۔ انہوں نے سماجی جد و جہد میں کی جانے والی اپنی عملی سرگرمیوں کا تعارف پیش کرتے ہوئے کہا کہ ہم نے ویکسینیشن کے خلاف آواز اٹھائی ہے، ڈیجیٹل کرنسی اور آدھار کارڈ کا سسٹم کے خلاف آواز بلند کی ہے جو کہ بین الاقوامی کارپوریٹ کے لیے راہیں ہموار کر رہا ہے، چنانچہ آج کے دور میں ہم کو چاہیے کہ تمام قدرتی وسائل بالخصوص زمین کو اپنے قابوں میں رکھیں، نوکری کے چکر میں نہ پڑیں، بلکہ زمین پر کاشتکاری کریں، اور قدرتی وسائل کا بہترین انداز میں استعمال کریں۔ انہوں نے تعلیم سے متعلق گفتگو کرتے ہوئے کہا کہ اگر تعلیم کا بنیادی مقصد صرف نوکری کا حصول ہے، تو سماج میں صرف غلام ہی پیدا ہوں گے، قائد و رہنما پیدا نہیں ہوں گے۔
اس پروگرام کے ایک اور مہمان مقرر، فاؤنڈر ایم ایس آئی ماونٹ فورٹ سوشل انسٹیٹیوٹ، برادر ورگیز نے انگریزی زبان میں جہد کاروں کو مخاطب کیا، بالخصوص پرولتاریہ ( لیبر ) گھریلو خواتین اور کچرا جمع کرنے والے ورکرز کے مسائل پر تفصیلی روشنی ڈالی اور کہا کہ عیسائیت مذہب صرف دو چیزوں پر منحصر ہے، جس میں خدا سے سچی محبت، اور پڑوسی کا خیال۔ انہوں نے کہا کہ 1997 کے سروے کے مطابق حیدراباد شہر میں 300 خاندان ایسے ہیں، جو کچرا جمع کرتے ہیں، سروے سے اس نتیجے پر پہنچا گیا کہ یہ 300 خاندان حیدرآباد کی جی ڈی پی میں 700 کروڑ روپے آمدنی کا اضافہ کر رہے ہیں، حیرت کی بات یہ ہے کہ سات سو کروڑ روپے کی آمدنی دینے والے یہ خاندانوں کی حالت ناگفتہ بہ ہے، یہ قابل رحم حالت میں زندگی بسر کر رہے ہیں، حالت یہ ہے کہ کووڈ 19 جیسے نازک دور میں بھی ان کو کسی بھی قسم کی بنیادی سہولیات فراہم نہیں کی گئی۔ انہوں نے کہا کہ سماج کی خدمت یا سماجی جہد کار بننے کے لیے لازمی ہے کہ ایسے افراد کی خدمت کریں کہ جن کو دنیا نے نظر کر دیا ہے۔
امیر حلقہ جماعت اسلامی ہند تلنگانہ ڈاکٹر خالد مبشر الظفر نے جہد کاروں کے پروگرام کی غرض و غایت پر تفصیلی روشنی ڈالتے ہوئے کہا کہ ہمیں کمیونٹی لیڈر بنا ہے ناکہ کمیونل لیڈر۔ سید فخر الدین علی احمد سیکریٹری حلقہ نے پروگرام کی کاروائی چلائی۔