Author Archives: Newsroom

جماعت اسلامی ہند تلنگانہ کی جانب سے امراء مقامی و نظماء ضلع کے لیے چار روزہ تربیہ گاہ کا انعقاد کیا گیا، اس تربیہ گاہ میں مرکزی و ریاستی ذمہ داران کے مختلف موضوعات پر لیکچرز و ورکشاپ منعقد ہوئے، پہلے روز ایس امین الحسن نائب امیر جماعت اسلامی ہند نے تزکیہ کا قرآنی تصور پر پاؤر پائنٹ پریزنٹیشن پیش کیا۔

عبد المجید شعیب معاون امیر حلقہ نے ریاست کے مختلف طبقات کا تعارف اور ان کی سماجی حیثیت سے متعلق گفتگو پیش کی اور ان طبقات سے ہمیں کس طرح تعلقات کو استوار کرنا چاہیے، انھیں جس طرح اپنے قریب کرنا چاہیےاس پر سیر حاصل گفتگو کی، مظلوم طبقات سے معاہدانہ تعلقات استوار کریں، بڑے پیمانے پر خدمت کی جانی چاہیے۔ڈاکٹر فہیم الدین احمد رکن شوریٰ جماعت اسلامی ہند نے ہندوستانی سماج اور اس کے سیاسی موحول پر گفتگو کی۔
ٹی عارف علی صاحب قیم جماعت نے کیڈر کو مخاطب ہوتے ہوئے کہا کہ اپنی زندگی کو کیسے بامقصد بنایا جاسکتا ہے، وہ کیا اصول ہیں جس کو اپنا کر اپنی زندگی کو کامیاب بنایا جاسکتا ہے، ان سارے اصولوں کو اپنایا جانا چاہیے، اپنی زندگی کو نافع بنانے کی منصوبہ بندی کی جانی چاہیے۔

اس موقع پر ڈائریکٹر تربیہ گاہ عبد الرقیب لطیفی نے کہا کہ اس کیمپ کا مقصد جماعت کے کیڈر کو مختلف میدانوں میں ماہر بنانا اور میدان عمل میں پیش آنے والے مسائل و چیلنجوں کو حل کرنے کے قابل بنانا ہے، یہ میقات رواں کا پہلا کیمپ تھا، ان شاءاللہ آئندہ دنوں میں بھی اس طرح کے کیمپ منعقد کئے جاتے رہیں گے۔

جماعت اسلامی ہند تلنگانہ کی سیاسی کمیٹی کی جانب سے ایک روزہ کیڈر میٹ منعقد کی گئی، کیڈر میٹ کو مخاطب کرتے ہوئے امیر حلقہ ڈاکٹر خالد مبشر الظفر صاحب نے کہا کہ آنے والے پارلیمانی انتخابات ملک کی تاریخ کے سب سے اہم انتخابات ہیں، ایک طرف بی جے پی ملک میں نفرت و مذہبی منافرت کے ذریعے فسطائیت کو نافذ کرنا چاہتی ہے اور ملک کے دستور کو بدلنا چاہتی یے تو دوسری طرف سیکولر پارٹیاں ملک کے سماجی ڈھانچے اور سیکولر کردار کو مضبوط کرنا چاہتی ہیں، اسی لیے آنے والے انتخابات ملک کو ایک نئے رخ پر لے جانے والے ہیں۔ ایسے موقع پر ہمیں اچھی حکمت عملی اختیار کرتے ہوئے فسطائی طاقتوں کو کچلنے کی کوششیں کرنی چاہیے۔
عبد المجید شعیب صاحب معاون امیر حلقہ و کنوینر سیاسی کمیٹی نے اپنے خیالات کا اظہار کرتے ہوئے کہا کہ آنے والے پارلیمانی انتخابات ملک کے سیاسی مستقبل کو طے کرنے والے ہیں، کیوں کہ یہ انتخابات ملک کے سیاسی، سماجی، معاشی و معاشرتی کیفیت پر اثرات مرتب کریں گے۔ آنے والے چیلنجیز کا مقابلہ کرنے کے لیے ہمارے اندر قوت عمل کی کمی محسوس ہوتی ہے، یہ اجلاس اپنے اندر عملی طور پر کام کرنے اور اپنے آپ کو عملی طور پر تیار کرنے کے لیے رکھا گیا۔ ترجیح بنیادوں پر ہمارے کرنے کے کام یہ ہیں کہ ووٹر لسٹ میں ناموں کا اندراج کروایا جائے، رائے دہی کے تناسب کو بڑھانے کی کوشش کی جائے، غیر مسلم بھائیوں سے اپنے تعلقات بڑھائے جائیں، با اثر افراد سے روابط بڑھائے جائیں، وظیفہ یاب افراد کی صلاحیتوں سے بھی استفادہ کیا جائے، ہر اسمبلی حلقے میں کم از کم چالیس نوجوانوں کو سیاسی کام کرنے کے لیے تیار کیا جائے، اس طرح ایک پارلیمانی حلقہ میں تین سو نوجوان ہمہ وقت کام کرنے کے لیے تیار رہیں۔
عبد الرحمن داؤدی صاحب رکن شوریٰ جماعت اسلامی ہند تلنگانہ نے پولرزیشن سے بچانے کے تدابیر بتاتے ہوئے کہا کہ جذباتی باتوں میں الجھ کر رد عمل ظاہر کرنے سے پرہیز کرنا چاہیے۔
صادق احمد صاحب رکن شوریٰ نے کہا کہ ہر مقام پر ایک سیکولر جمہوری فورم کا قیام ہونا چاہیے اور اس فورم میں سماج کے ہر طبقے کو شامل کیا جانا چاہیے۔
اس موقع پر کرن ویسا بھارت جوڑو مہم کے رکن نے اپنے خیالات کا اظہار کرتے ہوئے کہا کہ کسی بھی طبقہ کے ساتھ نا انصافی نہیں ہونی چاہیے، ہماری ذمہ داری ہے کہ ہم انصاف قائم کریں، ہمیں چاہیے کہ ہم مختلف طبقات کو ساتھ لے کر کام کریں۔ بی جے پی ملک کو ہندو راشٹر بنانا چاہتے ہیں، اور ہماری ذمہ داری ہے کہ ملک کے سیکولر کردار کو برقرار رکھنے کے لیے ہر ممکن کوشش کریں۔

اجلاس میں اضلاع و شہر سے تعلق رکھنے والے جماعت اسلامی ہند تلنگانہ ارکان و منتخب کارکنان شریک تھے۔

سرپور حلقے اسمبلی سے بی یس پی امیدوار ڈاکٹر آر ایس پروین کمار نے جماعت اسلامی ہند تلنگانہ کی جانب سے ان کی تائید کرنے پر اظہار تشکر ادا کرتے ہوئے اپنے ایک وفد کو آج دفتر حلقہ پر روانہ کیا اور امیر حلقہ ڈاکٹر خالد مبشر الظفر کو تہنیت پیش کی۔

جماعت اسلامی ہند حلقہ تلنگانہ کی جانب سے جاریہ ماہ کے اواخر میں منعقد ہونے والے اسمبلی انتخابات کے متعلق پچھلے چار ماہ سے غوروفکر کا سلسلہ جاری ہے۔انتخابات میں تائید کے سلسلے میں صحیح فیصلے تک پہنچنےکے لیے ریاست کے عوام کی رائے معلوم کی گئی۔ جس کے لیے جماعت اسلامی ہند حلقہ تلنگانہ نے ریاست کے تمام اضلاع میں پھیلے ہوئے اپنے وابستگان کے ذریعے مختلف سطحوں پر سروے   کروایا۔ مختلف سیاسی جماعتوں کی جانب سے کھڑےکیے گئے امیدواروں اور ان کی کارکردگی، عوام میں ان کی مقبولیت اور ان کی اہلیت  کا تفصیلی جائزہ لیا گیا۔ اس دوران جماعت اسلامی ہند نے ایک عوامی منشور تیار کیا اور اس عوامی منشور کے نکات پر ریاست میں مقابلہ کرنےوالی مختلف سیاسی جماعتوں کے قائدین سے تفصیلی تبادلہ خیال کیاگیا۔مذکورہ بالا تمام ملاقاتوں اور ریاست بھر میں پھیلے ہوئے اپنے  کیڈر کی جانب سے کیے گئے سروے اورجماعت کی مقامی اکائیوں  کی جانب سے طے  کردہ فیصلوں کو سامنے رکھتے ہوئے ریاست کی سیاسی کمیٹی نے حلقہ کی شوریٰ کے سامنے اپنی سفارشات پیش کیں۔ جماعت اسلامی ہند حلقہ کی مجلس شوریٰ نے ان سفارشات کی بنیاد پر یہ فیصلہ کیا ہے کہ ان انتخابات میں 68 اسمبلی حلقوں میں کانگریس پارٹی ، 41 اسمبلی حلقوں میں بی آرایس پارٹی اور 7 اسمبلی حلقوں میں مجلس اتحاد المسلمین کے امیدواروں کی تائید کی جائے۔ جب کہ ایک اسمبلی حلقہ میں سی پی آئی، ایک اسمبلی حلقے میں بی ایس پی کی تائید کی جائے گی۔

جماعت اسلامی ہند حلقہ تلنگانہ کی مجلس  شوری نے مذلورہ بالا تمام دلائل کے ساتھ اپنی سفارشات مرکز روانہ کردی تھیں اور مرکز جماعت نے جماعت کی مقامی اکائیوں کی آرا اور حلقہ کی شوریٰ کے دلائل کو قبول کرتے ہوئے شوریٰ کی سفارشات کی  توثیق کردی ہے۔

جماعت اسلامی ہند حلقہ تلنگانہ کی سیاسی کمیٹی نے یہ بھی طے کیا ہے کہ وہ اپنے کیڈرکے ذریعے عوام میں حق رائے دہی کے استعمال کے متعلق شعور کی بیداری کا کام انجام دے گی، اور اس امر کی کوشش کی جائے گی کہ عوام میں ووٹ کی اہمیت کا احساس پیدا ہو اور ریاست میں رائے دہی کے تناسب بڑھے۔ اس موقع پر ہم ریاست کے تمام رائے دہندوں سے اپیل کرتے ہیں کہ وہ اپنےحق رائے دہی کا ضرور استعمال کریں۔ اور جماعت اسلامی ہند حلقہ تلنگانہ نے کافی غوروخوص اور تفصیلی سروے کے بعد ریاست  اور عوام کی بہتری کے لیے  جو فیصلےکیے ہیں ان کے مطابق اپنے ووٹ کا استعمال کریں۔

جماعت اسلامی ہند حلقہ تلنگانہ کی جانب سے مختلف اسمبلی حلقوں میں جن پارٹیوں کی تائیدکا فیصلہ کیا ہے ان کی تفصیل  اس پریس ہینڈ اؤٹ کے ساتھ منسلک کردی گئی ہے۔