Author Archives: Newsroom

پریس نوٹ

سکریٹریٹ میں شہید مساجد کی دوبارہ اسی مقام پر تعمیرکا مطالبہ

چیف منسٹر اپنی خاموشی توڑیں، حکومت جلد اسی مقام پر فوری تعمیر کاواضح اعلان کرے

مولاناحامدمحمدخان امیر حلقہ جماعت اسلامی ہند‘حلقہ تلنگانہ

مولاناحامدمحمدخان امیر حلقہ جماعت اسلامی ہند‘حلقہ تلنگانہ نے اخبارات کے لیے جاری ایک بیان میں ریاستی حکومت سے پرزور مطالبہ کیاکہ سکریٹریٹ کے احاطے میں مسجد ہاشمی اورمسجددفاترمعتمدی کے اُسی مقام پروقت کے تعین کے ساتھ از سر نو تعمیر کا باضابطہ اعلان کرے۔امیرحلقہ نے کہا کہ وزیر اعلیٰ چندرشیکھرراؤ اس معاملے میں اپنی خاموشی توڑیں اور سکریٹریٹ کی شہیدکردہ مساجدکو دوبارہ اُسی مقام پر تعمیرکا فوری اعلان کریں۔ان دومساجد کی شہادت اورایک مندرکے انہدام کووزیر اعلیٰ نے ایک اتفاقی حادثہ قراردیتے ہوئے واقعہ کی سنگینی کوکم کرنے کی ناکام سیاسی کوشش کی ہے۔اور اس سلسلے میں ان کی جانب سے زبانی افسوس کا اظہار اور اُسی مقام پر حکومتی خرچ پر تعمیر کا زبانی وعدہ کسی سیاسی بیان سے زیادہ کچھ نہیں ہے اورمسلمانوں کے نزدیک اس کی کوئی اہمیت نہیں ہے۔مولانا حامد محمدخان نے کہا کہ نئے سکریٹریٹ کے نقشہ میں ان مساجد اورمندرکی کوئی نشاندہی نہیں کی گئی ہے۔مسلمانوں کے تمام تنظیموں اورعلماء مشائخین کے مطالبہ کے باوجودریاستی حکومت نے اس افسوس ناک واقعے کے تدارک کے لیے کوئی واضح تیقن نہیں دیا ہے۔امیرحلقہ نے کہا کہ مسلمان اس وقت سخت صدمہ کی حالت میں ہیں اور یہ صدمہ گذرتے وقت کے ساتھ مزید گہرا ہوتا جائے گا۔ محترم حامدمحمدخان نے کہا کہ حکومت پریہ بات واضح رہنی چاہئے کہ جس زمین پر مسجد تعمیرکی جاتی ہے وہ تاقیامت مسجد ہی رہتی ہے۔اسے نہ کسی مقام پر منتقل کیا جاسکتا ہے اور نہ کوئی زمین اس کا نعم البدل ہوسکتی ہے۔مسجد کی زمین کوکسی کو دینے کا نہ وقف بورڈ اور نہ مسلمانوں کواختیار حاصل ہے۔امیرحلقہ نے مطالبہ کیا کہ مسلمانوں کے جذبات واحساسات اور مساجد کے تقدس اوران کی اہمیت کے پیش نظرریاستی حکومت فوری وقت کے تعین کے ساتھ اسی مقام پران مساجد کی تعمیراپنے خرچ پر کروانے کا واضح اعلان کرے۔اورعوام میں اپنی گرتی ساکھ کو بحال کرے۔ساتھ ہی نئی عمارت کے نقشہ میں ان مساجدکی اسی مقام پر نشاندہی بھی کی جائے۔یہی حل ریاست تلنگانہ کی روایتی مذہبی رواداری کی بقا اورحکومت کی سیکولر پالیسی کی بھی علامت ہوگی۔ مولانا حامدمحمدخان نے کہا کہ حکومت اگر اس فیصلہ میں ناکام ہوجاتی ہے تو پھر عوام کے پاس جمہوری وآئینی طریقوں کو اپناتے ہوئے احتجاج کے علاوہ کوئی چارہ نہیں ہوگا۔

پریس سکریٹری

Update: Registrations are now closed.

(زیر اشتراک شعبہ ایچ آرڈی جماعت اسلامی ہند، حلقہ تلنگانہ و تلگو اسلامک پبلی کیشنز،حیدرآباد)تمہید و تعارف:زبان  کوسیکھنے کا عمل انسان کی پیدائش کے وقت سے ہی شروع ہوجاتا ہے اورپھر زندگی بھر جاری رہتا ہے۔ جب لوگ ترسیل و مواصلات کے لئے زبان کااستعمال کرتے ہیں تو وہ اپنے خیالات ، احساسات ، نظریات ، عقائد اور تجربات کو روشناس کرانے ، رشتہ داروں اور دوستوں کے ساتھ تعلقات قائم کرنے اور دنیا کےتئیں اپنے احساسات کو مربوط کرنے کی کوشش کرتے ہیں۔ زبان کو سیکھنے کے عمل میں خود سیکھنے والے، ​​اساتذہ اور ماحول سبھی کا اپنا اپنا کردار ہوتا ہے۔ اس پروگرام کے ذریعہ ہم ایسا ماحول فراہم کرنے کی کوشش کر رہے ہیں جس میں کوئی بھی شخص اپنے ذاتی ، معاشرتی، تجارتی، اور دعوتی اہداف کے حصول کے لئے تلگو زبان کے بنیادی علم اور ترسیلی ومواصلاتی مہارتوں میں ارتقا کی موثرحکمت عملیاں تیار کرتا رہے۔

مربی اساتذہ (تلگو ماہرین)

مختلف سیکھنے والوں کو ایڈجسٹ کرنے کے لئےہم نےتین تلگو ماہرین مربی اساتذہ کی خدمات کو حاصل کیا ہےجو الگ الگ  اوقات میں اپنی  آن لائین خدمات انجام دیں گے۔ان کی تفصیلات درج ذیل میں دی جارہی ہیں۔

جناب محمد عبدالصمدصاحب ، ایم اے

ایک ممتاز مصنف ، ڈبیٹر اور تلگو معلم ہیں ،انہیں تلگو زبان سکھانے کے میدان میں 25 سال سے زیادہ عرصہ کابھرپور تجربہ حاصل ہے۔موصوف کو کئی تمغوں اورانعامات سے نوازا گیا ہے جن میں  مانو ، روزنامہ سیاست ، اےآئی آئی ٹی اے ، ایس آئی او ، اور جماعت اسلامی ہند جیسی تنظیموں اور اداروں کی جانب سے بہترین تلگو معلم کے ایوارڈزبھی شامل ہیں۔ وہ بول چال کی کلاسوں کے ذریعہ غیر تلگوداں افراد کی رہنمائی اورانہیں تلگو سکھانے کے لئے خصوصی کورسوں کے انعقاد کی مہارت رکھتے ہیں۔ انہیں وکیلوں ، ڈاکٹروں، پیشہ ورماہرین، کاروباریوں، سیلز کے نمائندوں، پولیس اہلکاروں ، افسران ، اور سیاستدانوں بشمول جناب محمود علی صاحب، معزز وزیر داخلہ،حکومتِ تلنگانہ کو تلگو زبان سکھانے کا اعزاز حاصل ہے۔ان کی کلاس روزانہ 10.30 بجے صبح  تا 11.30 بجے صبح ہوں گی۔

جناب عبدالواحدصاحب ، بی ایس سی

ایک تجربہ کار صحافی ، مترجم اور تلگو زبان میں متعدد کتابوں کے مصنف۔ موصف کئی تلگو چینلز ، جرائد اور نیوز پیپرز سے وابستہ ہیں جن میں ٹی وی 9 اورسنسکرتی ، ایچ ایم ٹی وی ، اسٹوڈیو این ، مناتلنگانہ ، اورنواتلنگانہ وغیرہ قابل ذکر ہیں۔ موصوف تلگو زبان کے ماہرہونے  کے علاوہ نہایت ہی تخلیقی اور اختراعی معلم،مربی اورسرپرست  کی حیثیت سے معروف ہیں ۔ غیر تلگوداںسیکھنے والوں کی رہنمائی اور ان کی عملی تیاری  کا ان کے پاس وسیع تجربہ ہے۔موصوف برسوں سے تلگوہفتہ وار گیٹورائی کی ادارتی ٹیم کاحصہ ہیں۔  ان کی کلاس روزانہ 8.30 بجے صبح  تا 9.30 بجے صبح ہوں گی۔

محترمہ عائشہ سلطانہ صاحبہ، ایم اے،ایم ایڈ

ایک تجربہ کارخاتون ماہر تعلیم جنہوں نے اپنی محنت اور جستجو سےترسیل و مواصلات کی بہترین مہارت حاصل کی ہے ۔وہ ایک ممتاز  تلگو مقررہ اور بہترین تلگو ڈبیٹر ہیں۔تعلیم و تدریس کے میدان میں وسیع تجربہ کے ساتھ بڑی عمر کے افراد ، گھریلو خواتین ، ملازمت پیشہ خواتین اور متنوع کلاس روم میں طلبا و طالبات کوتلگو زبان سکھانےمیں انہیں مہارت حاصل ہے۔ ان کی کلاس روزانہ 07.30 بجے شام  تا 08.30 بجے شام ہوں گی۔

کورس میں کون داخلہ لے سکتے ہیں؟

یہ پروگرام خاص طور پر ان سیکھنے والوں کے لئے ڈیزائن کیا گیا ہے جن کی مادری زبان تلگو نہیں ہے۔لہذا اس کورس میں ہر عمر کے مرد و خواتین داخلہ لے سکتے ہیں۔ لیکن تلنگانہ کے افراد خاص طور پرنوجوانوں کو ترجیح دی جائے گی۔ 

داخلہ اور انتخاب

پروگرام میں داخلہ کے لئے درج ذیل لنک پر رجسٹریشن کے عمل کو مکمل کرنا ہوگا۔

رجسٹریشن لنک

جن لوگوں کا انتخاب عمل میں آئے گا انہیں ای میل اور واٹس ایپ پر مطلع کیا جائے گا۔انتخاب کے بعد بینک اکاونٹ میں کورس فیس 500 روپے جمع کرنی ہوگی جو انتخاب کی اطلاع کے ساتھ دیا جائے گا۔ متعلقہ آن لائین کلاس کا لنک بھی انفرادی طور پر فراہم کیا جائے گا۔یاد رکھیں اس لنک کو کسی اور کے ساتھ قطعاً شئیر نہ کریں۔کورس کے آغاز سے ایک دن پہلے تک رجسٹریشن کھلا رہے گا۔طلبا کو سہولت دی گئی ہے کہ وہ اپنے مربی اور اوقات تدریس و اکتساب میں اپنی ترجیح درج کریں، لیکن صرف ممکنہ صورتوں میں ہی ان کی ترجیح کا خیال رکھا جائے گا۔ ایک دفعہ رجسٹر ہونے کے بعد اساتذہ کی تبدیلی بھی ممکنہ صورتوں میں ہی قبول کی جائے گی۔

کورس میں برقراری کی شرائط

پروگرام میں داخلہ لینے کے بعد مسلسل شرکت لازمی ہوگی۔روزانہ حاضری کا اہتمام ہوگا۔ اس بات کو یقینی بنائیں کہ برقی یا انٹرنیٹ کی سہولت اگر منقطع ہو جاتی ہے تو متبادل کا امکان رہے۔ برقی کے انقطاع  اور وائی فائی کی عدم موجودگی کے باوجود موبائیل ڈاٹا پر کلاس اٹینڈ ہوسکتی ہے۔تین دن لگاتار غیر حاضری کی صورت میں رجسٹر سے نام خارج کردیا جائے گا۔اگر ہوم ورک اور اسائنمنٹ کی تکمیل میں بھی مسلسل کاہلی اور عدم تعاون نوٹ کیا جائے تو مربی کی جانب سے رجسٹر سے نام خارج کردیا جاسکتا ہے۔

تدریس کا طریقہ،پلیٹ فارم ،حکمت عملی اور نصاب

عام طور پر اسکولوں میں استعمال کئے جانے والےتدریس کے عمومی طریقہ سے ہٹ کراساتذہ راست گفتگو اور باہمی تبادلہ خیال کا طریقہ استعمال کریں گے۔سبھی طلبا کی شرکت اور بات چیت کو یقینی بنایا جائے گا۔چوں کہ توجہ بات چیت اور گفتگو پر  مرکوزہے لہذا تحریر اور گرامر صرف بقدر انتہائی ضرورت استعمال کئے جائیں گے۔کلاسز عام طور پر زوم پلیٹ فارم کے ذریعہ انجام دئیے جائیں گے۔طلبا کو کلاس روم سرگرمیوں  کے علاوہ ہوم ورک اور اسائنمنٹ بھی دئیے جائیں گے ۔پی ڈی ایف مواد ، آڈیو اور ویڈیو معاون مواد بھی فراہم کیا جائے گا۔حسب ضرورت پرسنل کاونسلنگ بھی کی جائے گی۔ ان مقاصد کے لئے واٹس ایپ گروپ تشکیل دئیے جائیں گے۔منتخبہ طلبا و طالبات کوتفصیلی نصاب الگ سے فراہم کیا جائے گا۔ایک کلاس کی تعداد 30 تا 40 مقررکی گئی ہے۔اس تعداد میں عملی تجربے کے بعد کمی و بیشی ممکن ہے۔

جانچ اورکورس کی تکمیل

45 روزہ   تدریسی پروگرام کے علاوہ 3 دن جانچ کے لئے رکھے گئے ہیں۔پورے کورس کے دوران دو درمیانی جانچ ہوں گی اور ایک جانچ اختتام کورس پر کی جائے گی۔ جانچ کا طریقہ زبانی سرگرمیوں پر مشتمل ہوگا،جن کی تفصیلات الگ سے طلبا و طالبات کو فراہم کی جائیں گی۔ناکام ہونے والے یا کم تر مظاہرہ کرنے والے طلبا اس کورس کو دوبارہ فیس کی ادائیگی  کے ساتھ رجسٹر کرسکتے ہیں۔کورس  میں رجسٹریشن کے بعدکسی بھی وجہ سےکورس  کو چھوڑنے یاخارج کئے جانے کی صورت میں رجسٹریشن فیس واپس نہیں کی جائے گی۔کورس کی کامیاب تکمیل پر اسنادات فراہم کئے جائیں گے۔

کورس کوارڈی نیشن

ابتداً متعلقہ ریسورس پرسنز (اساتذہ) اپنے گروپ کو کوراڈی نیٹ کریں گے۔ان شاءاللہ جلد مرکزی سطح پرکورس کوارڈی نیٹر کا بھی تقررعمل میں لایا جائے گا۔