Urdu Archives - Page 13 of 15 - Jamat-e-Islami Hind Telangana

Written by NewsroomDecember 14, 2020

سدبھاؤنا فورمس وقت کی اہم ترین ضرورت‘ جماعت اسلامی ہندکی جانب سے اورینٹیشن پروگرام

پریس نوٹ

سدبھاؤنا فورمس وقت کی اہم ترین ضرورت‘ جماعت اسلامی ہندکی جانب سے اورینٹیشن پروگرام کا انعقاد
نائب امیرجماعت انجینئرمحمدسلیم، امیرحلقہ تلنگانہ مولانا حامدمحمدخان اورجناب صادق احمدکا خطاب

بسم اللہ الرحمن الرحیم

جماعت اسلامی ہند حلقہ تلنگانہ شعبہ ہندوستانی سماج (ملکی اُمور) کی جانب سے شعبہ ہندوستانی سماج کے مقامی نظماء وناظمات کے لیے کل یومی اورینٹیشن پروگرام دفتر حلقہ جماعت اسلامی ہند لکٹرکوٹ پر منعقد ہوا۔ اس موقع پراپنے صدارتی خطاب میں نائب امیرجماعت اسلامی ہند جناب انجینئر محمدسلیم نے کہا کہ اس وقت ملک میں فرقہ پرستی اورفرقہ پرست طاقتوں کا مقابلہ کرنے کے لیے سیکولرذہن رکھنے والے افراد کوملکر کام کرنے کی ضرورت ہے۔ انہوں نے کہا کہ اس وقت ملک میں تیزی سے فرقہ پرستی کا زہرگھولا جارہا ہے،ان حالات میں محبت بھائی چارگی کے پیغام کوعام کرنے کی ضرورت ہے۔انجینئر محمدسلیم نے سدبھاؤنا فورمس کے قیام کی ضرورت پربھی زوردیتے ہوئے کہا کہ مقامی سطحوں پر سیکولر،امن پسند اورصاف ذہن رکھنے والے تمام مذاہب کے لوگوں پر مشتمل سدبھاؤنا فورمس قائم کئے جائیں جس کے ذریعہ سماج میں رہنے بسنے والے لوگوں کے درمیان آپسی غلط فہمیاں دورہوں اور فرقہ پرستی کا مقابلہ کیا جاسکے۔انہوں نے سماج میں اچھے اقدار کو مضبوط کرنے کی بھی تلقین کی۔ اس موقع پر امیرحلقہ تلنگانہ مولانا حامدمحمدخاں نے اپنے خطاب میں کہا کہ فرقہ پرستی کے سد باب کے لیے تمام فرقوں کے لوگوں کے درمیان تال میل اور اتحاد کی ضرورت ہے۔انہوں نے مختلف مثالوں کے ذریعہ واضح کیا کہ سدبھاؤنا فورمس کے ذریعہ امن واتحاداور بھائی چارگی کوفروغ دیاجاسکتا ہے۔ مولانا حامدمحمدخان نے کہا کہ یہ کام معمولی کام نہیں ہے بلکہ قرآن وحدیث اور نبی کریم ﷺ کی تعلیمات سے بھی یہ بات ثابت ہے کہ خود نبی کریم ﷺ نے مظلوموں کے تعاون کے لیے اس طرح کے معاہدے کئے تھے۔قاضی محبوب شریف نظامی صاحب کی تذکیرسے پروگرام کاآغاز ہوا۔سدبھاؤنا فورمس کے قیام اور مواقع کے عنوان پر پینل ڈسکشن منعقد ہوا جس میں جناب غوث الرحمن (کورٹلہ) جناب شیخ حسین (نظام آباد) جناب ہادی پٹیل (حیدرآباد) اور جناب زبیراحمد کریم نگر نے شرکت کی۔محترمہ عائشہ سلطانہ صاحبہ معاون ریاستی ناظمہ شعبہ خواتین تلنگانہ نے سوشل میڈیا کے استعمال سے متعلق پاورپوائنٹ پریزنٹیشن پیش کیا۔ جناب صادق احمد سکریٹری ہندوستانی سماج(ملی اُمور) نے اپنے اختتامی کلمات میں سدبھاؤنا فورمس کی تشکیل اوراس کے طریقہ کارسے متعلق تفصیلات پیش کیں۔جناب احمدابوسعیدکی دُعا پرپروگرام کا اختتام ہوا۔

Written by NewsroomNovember 29, 2020

جماعت اسلامی ہندحلقہ تلنگانہ کی معروف شخصیت و سابق امیر حلقہ گجرات مولانا محمد عبدالغفور کا سانحہ ارتحال

امیر جماعت اسلامی ہند محترم سید سعادت اللہ حسینی وامیر حلقہ تلنگانہ محترم حامد محمد خان کا اظہار تعزیت

جماعت اسلامی ہند تلنگانہ کی بزرگ و معتبر شخصیت و سابق امیر حلقہ گجرات مولانا محمد عبدالغفور صاحب طویل علالت کے بعد 27 /نومبر بروز جمعہ بعمر 82 سال‘ اپنے رب حقیقی سے جاملے۔ اُن کے سانحہ ارتحال پر امیر جماعت اسلامی ہند محترم سید سعادت اللہ حسینی نے اظہار تعزیت کر تے ہوئے اپنے بیان میں کہا کہ مرحوم ایک بہترین مربی اور انسان ساز شخصیت تھے۔ حیدرآباد کی معروف درس گاہ جامعہ دارالھدیٰ میں ایک مربی کی حیثیت سے اُنہوں نے سینکڑوں نوجوانوں کی علمی و فکری اور عملی تربیت فرمائی۔ مرحوم جماعت اسلامی ہند گجرات کے امیر حلقہ بھی رہے۔ مرحوم کا تعلق مستقر عادل آباد سے تھا۔اُنہوں نے ناظم جماعت اسلامی ہند عادل آباد کی حیثیت سے بھی اپنی خدمات انجام دیں۔ جناب عبدالغفور صاحب مرحوم اپنے عمر کے ابتدائی حصہ ہی سے تحریک اسلامی سے وابستہ ہوئے اور تا دم حیات وابستہ رہے۔ایمرجنسی کے زمانے میں مرحوم طویل عرصہ تک قید و بند کی مشقتیں برداشت کیں۔ امیر جماعت اسلامی ہند نے مرحوم کے مکان پہنچ کر اُن کے فرزندان اور متعلقین سے ملاقات کی اور اُنہیں پُر سہ دیا۔ امیرحلقہ تلنگانہ مولانا حامد محمد خان نے مرحوم کے انتقال پر گہرے رنج اور تعزیت کا اظہار کرتے ہوئے کہا کہ مرحوم کے ساتھ میری کئی یادیں جڑی ہوئی ہیں آج میں اپنے ایک عزیز سے محروم ہو گیا ہوں۔امیر حلقہ نے کہا کہ مرحوم نے اپنے حسن انتظام اور اپنی مربیانہ صلاحیتوں سے جامعہ دارالھدیٰ کو نئی بلندیاں عطا کیں۔ اور یہ جامعہ دارالھدی کی تاریخ کا سب سے روشن دور تھا۔ مولانا حامد محمد خان نے کہا کہ مرحوم ایک خوش مزاج‘ ملنسار‘ اصول پسند اور پابند شریعت شخصیت کے حامل تھے۔ اپنے شاگردوں ہی سے نہیں بلکہ تحریک کے کم عمر وابستگان سے بھی وہ نام بہ نام واقف رہتے۔ذمہ داران جماعت اسلامی ہند حلقہ تلنگانہ جناب محمد نصیر الدین‘ جنرل سکریٹری‘ جناب محمداظہر الدین‘ جناب سید عبدالباسط انور‘ جناب ایم این بیگ زاہد‘ ناظم شہر حافظ محمد رشاد الدین نے مرحوم کے سانحہ ارتحال پر تعزیت کر تے ہوئے مرحوم کے انتقال کو ملت اسلامیہ کا عظیم نقصان قرار دیا۔ ساتھ ہی مرحوم کے درجات کی بلندی اور مغفرت کی دعا کی۔ مرحوم پروفیسر محمد خالد مبشر الظفر سکریٹری شعبہ ایچ آر ڈی حلقہ تلنگانہ کے والد تھے۔مرحوم کی نماز جنازہ 28 نومبر بروز ہفتہ بعد نماز فجر ا سلامک سنٹر ٹولی چوکی میں ادا کی گئی۔ لواحقین میں اہلیہ کے علاوہ پانچ فرزندان اور چھ دختران شامل ہیں۔ مزید تفصیلات کے لئے مو بائیل نمبر 9866685248ربط کیا جاسکتا ہے۔

پریس سکریٹری

Written by NewsroomSeptember 27, 2020

معین آباد عصمت ریزی و قتل واقعہ کی متاثرہ کے اہل خانہ سے جماعت اسلامی ہند تلنگانہ کے وفد کی ملاقات

خاطی کو کیفرکردار تک پہنچانے اور متوفیہ کے ساتھ جلد انصاف کا مطا لبہ : امیر حلقہ مولانا حامد محمد خان

Press Note

جماعت اسلامی ہند تلنگانہ کے ایک وفد نے امیر حلقہ تلنگانہ مولانا حامد محمد خان کی قیادت میں معین آباد میں کل پیش آئے عصمت ریزی و قتل واقعہ کی متاثرہ کے افراد خاندان سے انکے گھر پہنچ کر ملاقات کرتے ہوئے تعزیت کی پرسہ دیا اور مالی امداد بھی کی۔اسکے علاوہ متعلقہ پولیس اسٹیشن پہنچ کر خاطیوں کے خلاف سخت سے سخت کاروائی کی مانگ کی۔واضح رہے کہ اس واقعہ کو ابتد اء میں خودکشی بتانے کی کوشش کی جارہی تھی لیکن مقامی عوام اور میڈیا نے واقعہ کی حقیقت کو آشکار کیا۔دراصل مدھو یادو نامی،درندہ صفت شخص کچھ عرصہ سے غریب مسلم لڑکیوں کی معاشی مجبوریوں کا فائدہ اٹھا کر انکا استحصال کر رہا تھااور پھر اس نے مبینہ طور پر ایک معصوم لڑکی کو اپنی حوس کا نشانہ بنانے کے بعد قتل کرتے ہوئے اس واقعہ کو خودکشی ظاہر کرنے کی کوشش کی۔امیر حلقہ مولانا حامد محمد خان نے حکومت،پولیس اور انتظامیہ سے اپیل کی کے نربھئے ہو کر نربھیاء ایکٹ کا خاطی کے خلاف استعمال کیا جائے اور اس گھناؤنے جرم کے مرتکب کے خلاف سخت سے سخت کاروائی کی جائے۔تاکہ اس غریب مسلم خاندان کے ساتھ انصاف ہواور اسطرح کے واقعات کا مسقبل میں تدارک ہوسکے۔امیر حلقہ نے حکومت سے مطالبہ کیا کہ متاثرہ خاندان جو کہ انتہائی کسمپرسی کی زندگی بسر کر رہا ہے انہیں فوری ایکس گریشیاء دیاجائے اور ڈبل بیڈ روم مکان بھی متوفیہ کی بہن کو دیا جائے جو اس وقت سخت صدمہ سے دوچار ہے۔متوفیہ کے افراد خاندان سے ایک فرد کو نوکری بھی فراہم کی جائے۔ساتھ ہی فاسٹ ٹریک عدالت میں مقدمہ چلاتے ہوئے مجرم کو سزا دی جائے اور اس واقعہ میں ملوث دیگر مجرمین کو بھی سامنے لایا جائے۔جماعت اسلامی کے وفد میں جناب محمد اظہر الدین،سکریٹری رابطہ عامہ،جناب ایم این بیگ زاہد،سکریٹری اسلامی معاشرہ،ڈاکٹر شیخ محمد عثمان سکریٹری ملی امور،جناب عبدالہادی پٹیل ناظم ضلع وقارآباد،جناب قدرت اللہ و دیگر موجود تھے۔

پریس سکریٹری

Written by NewsroomSeptember 23, 2020

جماعت اسلامی ہند حلقہ تلنگانہ کے نئے شعبہ جات کے سکریٹریز کا تقرر

جناب محمد نصیر الدین جنرل سکریٹری جماعت اسلامی ہند حلقہ تلنگانہ کی اطلاع کے بموجب محترم امیر جماعت اسلامی ہند نے میقات رواں 2019-23 میں نئے شعبہ جات کی بقیہ مدت کیلئے جناب محمد عبدالرقیب حامد لطیفی کا بحیثیت سکریٹری شعبہ فکر اسلامی کا فروغ ‘ ڈاکٹر شیخ عثمان کا بحیثیت سکریٹری شعبہ ملی اُمور اور جناب محمد عبدالمجید صاحب کا بحیثیت سکریٹری شعبہ عالمی اُمور تقرر کیا ہے۔ جبکہ مجلس شوریٰ حلقہ تلنگانہ کی خالی شدہ ایک نشست کے لئے کثرت آراء سے جنا ب عبدالمجید شعیب صاحب کا بقیہ میقات کیلئے بحیثیت رکن شوری انتخاب عمل میں آیا۔
امیر حلقہ جماعت اسلامی ہند حلقہ تلنگانہ مولانا حامد محمد خان صاحب نے دعاء فرمائی کہ اللہ تعالیٰ اِن نو تقرر شدہ سکریٹریز و نو منتخب رکن مجلس شوریٰ کو ان اہم ذمہ داریوں کو ادا کرنے کی ہر پہلو سے ضروری استعداد و صلاحت عطافرمائے۔ اس موقع پر محترم امیرحلقہ نے تمام وابستگان جماعت سے بھی خواہش کی کہ وہ ان ذمہ داران کا اقامت دین کے کاموں میں بھرپور تعاون فرمائیں۔

Written by NewsroomSeptember 22, 2020

مرکزی حکومت کسانوں کے مطالبات پر سنجیدگی سے غور کرے، اور بل واپس لے

مرکزی حکومت کسانوں کے مطالبات پر سنجیدگی سے غور کرے، اور بل واپس لے : امیر حلقہ حامد محمد خان

جماعت اسلامی ہند حالیہ دنوں پارلیمنٹ میں پاس کئے گئے تینوں بل کی مخالفت کرتی ہے۔ کیونکہ وہ بل استحصالی اور کسانوں کے مفاد کے خلاف ہیں۔ ان بلوں کے نتیجہ میں کاشتکاروں کے لئے فصلوں کی قیمتیں کم ہو جائیں گی۔ نیز فوڈ سیکورٹی شدید خطرے میں پڑ جائے گی۔ کیونکہ حکومت کی مداخلت ختم ہو جائے گی۔ ہندوستانی اشیائے خوردنی اور کھیتی باڑی کا نظام لالچی کارپوریٹس‘ ملٹی نیشلز اور مارکٹ فورسز کے تابع ہو جائے گا۔ ان خیالات کا اظہار امیر حلقہ جماعت اسلامی ہند حلقہ تلنگانہ جناب حامد محمد خان نے اپنے صحافتی بیان میں کیا انہوں نے کہاکہ اس طرح سے ذخیرہ اندوزی اور بلیک مارکیٹنگ کے بڑھ جانے سے کسانوں کے استحصال میں اضافہ ہو جائے گا۔ کسانوں کو ایم ایس پی(مینیمم اسپورٹ پرائس)سے کم قیمت پر اپنی فصلیں لوکل مارکٹ میں بیچنے پر مجبور ہو نا پڑے گا۔ وہ خود سے اپنی پیداوار کو دور دراز کے فاصلے تک نہیں بھیج پائیں گے۔ ایسا محسوس ہوتا ہے کہ حکومت ایف سی آئی (فوڈ کارپوریشن آف انڈیا)‘ ایم‘ ایس‘ پی (مینیمم اسپورٹ پرائس)اور پی ٹی ایس (پبلک ڈسٹری بیوشن سسٹم) انفراسٹرکچر کو کمزور اور ختم کرنا چاہتی ہے۔ یہ حکومت شعبہ زراعت کی لگام ایسی طاقتوں کے ہاتھوں میں سونپنا چاہتی ہے جو اس استحصال اور منافع کے سلسلہ کو برقرار رکھے۔ انہوں نے کہا کی ہم مرکزی حکومت سے مطالبہ کر تے ہیں کہ وہ اس کسان مخالف قانون کو واپس لے اور ایسی پالیسیاں نافذ کرے جو مستقل طور پر ان کی آمدنی میں اضافہ کرے۔ خوراک اور بیج کی سیکورٹی کو برقرار رکھنے کے ساتھ ساتھ زمین کی مالکانہ اصلاحات کا احترام کرے نیز زرعی منڈیوں کی روایتی تجارت کو بحال رکھتے ہوئے اس میں مزید سہولیات کا اضافہ کرے۔ امیر حلقہ تلنگانہ جناب حامد محمد خان نے کہا کہ مرکزی حکومت کو چاہیے کہ وہ کسانوں کے مطالبات پر سنجیدگی سے غور کرے اور ان کے خدشات اور اندیشوں کو دور کرے اور یہ بل واپس لے نیز ان کے نمائندوں سے گفتگو کرے۔

پریس سکریٹری