Urdu

عید قرباں اللہ تعالی کی اطاعت و فرما نبرداری میں یکسوئی کا درس دیتی ہے۔
امیر حلقہ جماعت اسلامی ہند حلقہ تلنگانہ مولانا حامد محمد خان کی جانب سے عامتہ المسلمین کو عید الاضحی کی مبارکباد

مولانا حامد محمد خان امیر حلقہ جماعت اسلامی ہندحلقہ تلنگانہ نے عید الاضحی کے موقع پر عامتہ المسلمین کو عید قرباں کی پر خلوص مبارکباد دیتے ہوئے کہا کہ عید قرباں محض جانور کی قربانی کا نام نہیں ہے بلکہ اللہ تعالیٰ کی اطاعت و بندگی میں حضرت ابراہیم ؑ و حضرت اسمٰعیل ؑ کی یکسوئی اور سرِ تسلیم خم کرنے کی سنت کی تجدید کا پیغام ہے۔عید قرباں یہ درس دیتی ہے کہ اہل ایمان کے لئے اللہ کے احکام کی اطاعت و پیروی دنیا و مافیھا سے بہتر اور افضل ہے۔ عید قرباں کے موقع پر صاحب استطاعت افراد کے لئے قربانی کرنا تو واجب ہے لیکن تمام اہل ایمان کے لئے لازم ہے کہ وہ اس بات کا عہد کریں کہ ان کی آنے والی ساری زندگی اور زندگی کے سارے افعال و اعمال صرف اور صرف اللہ کی اطاعت و بندگی میں بسر ہو نگے اور وہ اللہ کی اطاعت اور اللہ کی بندگی کے لئے ا پنے جان مال و نفسانی خواہشات کو قربان کردیں گے۔ مولانا حامد محمد خان نے عامتہ المسلمین سے اپیل کی کہ وہ عید کے موقع پر قربانی کرتے ہوئے اس بات کو یاد رکھیں کہ اسلام نے پاکی و صفائی کو نصف ایمان قرار دیا ہے اور اپنی خوشیوں میں برادران وطن کو بھی حتی الوسع شامل رکھنے کی کوشش کریں۔

میڈیا اینڈآئی ٹی ڈپارٹمنٹ
جماعت اسلامی ہند تلنگانہ

کووڈ پروٹوکول کے ساتھ عبادت گاہوں کی کشادگی کا مطالبہ : امیرحلقہ مولانا حامدمحمدخان

امیرحلقہ جماعت اسلامی ہند حلقہ تلنگانہ مولانا حامدمحمدخان نے اپنے صحافتی بیان کے ذریعہ حکومت سے فوری طور پر ریاست میں مساجد کی کشادگی کا مطالبہ کیا۔ انہوں نے کہا کہ کووڈ 19- کے بڑھتے ہوئے معاملات کے پیش نظرحکومت نے محکمہ صحت کی سفارشات کی بنیاد پرابتداء میں 4گھنٹے صبح (6تا10بجے)دن نرمی کے ساتھ لاک ڈاؤن نافذ کیا۔بعدمیں اسے ایک بجے تک بڑھایاگیا اور اب صبح 6بجے تا شام5بجے تک لاک ڈاؤن کے اوقات میں نرمی دی گئی ہے اور شام 6بجے تاصبح6بجے تک لاک ڈاؤن جاری ہے۔ انہوں نے کہا کہ اب جبکہ صبح 6تاشام5بجے نرمی کے اوقات میں تقریباً تمام ہی تجارتی ادارے، دفاتر حتیٰ کہ شراب خانے بھی کھلے رکھنے کی اجازت ہے لیکن مساجدمیں مصلیوں کی محدود تعدادمیں داخلہ کی اجازت دی گئی ہے۔ موجودہ حالات میں کووڈ پروٹوکول،ماسک،سینیٹائزر،طبعی دوری کی برقراری کے ساتھ مساجد میں نماز کی اجازت فوری طور پر دی جائے۔ مولانا حامدمحمدخان نے حکومت وانتظامیہ سے مطالبہ کیا کہ کووڈ پروٹوکول کی پابندی کے ساتھ مساجد کی فوری اثر کے ساتھ مکمل کشادگی عمل میں لائیں۔اس موقع پر عوام الناس سے بھی اپیل کی کہ وہ کووڈ قواعد کی پابندی کریں۔

جاری کردہ : شعبہ میڈیا ، جماعت اسلامی ہند،تلنگانہ

حیدرآباد (راست) یونیورسٹیز کے وائس چانسلرز،تلنگانہ پبلک سروس کمیشن کے اراکین اور عثمانیہ یونیورسٹی کے اہم عہدوں پر کسی بھی مسلمان کی عدم نامزدگی پر اظہار حیرت وافسوس ظاہر کرتے ہوئے امیرحلقہ جماعت اسلامی ہند حلقہ تلنگانہ مولانا حامدمحمدخان نے کہا کہ مسلمان ہر شعبہ حیات میں اپنی قابلیت وصلاحیت کا لوہا منواچکے ہیں اور کسی بھی دیگرقوم سے پیچھے نہیں ہیں۔لیکن سیکولرزم،رواداری اور انصاف کا دم بھرنے والی حکومت کے سربراہ جناب کے.چندرشیکھر راؤنے حالیہ مختلف تقررات میں مسلمانوں کی عدم شمولیت کے ذریعہ مسلمانوں کو مایوسی اور بے چینی میں مبتلاء کردیا ہے۔سابقہ حکومتوں نے بھی کبھی مسلمانوں کو اس طرح نظر انداز نہیں کیا، لیکن ٹی.آر.ایس حکومت کا مسلمانوں کے ساتھ موجودہ رویہ غور طلب ہے۔ سوال یہ پیدا ہوتا ہے کہ آخر کس کی ایماء پر مسلمانوں کو سرکاری عہدوں سے دور رکھنے کی کوشش کی جارہی ہے۔ لگتا ہے کہ چندمتعصب اورمسلم مخالف مشیرچیف منسٹر کے دفترمیں داخل ہوئے ہیں اور چیف منسٹرکو گمراہ کررہے ہیں۔مولانا حامدمحمدخان نے کہا کہ انہوں نے اس ضمن میں وزیر داخلہ جناب محمد محمود علی صاحب کے علاوہ دیگر اعلی عہدیداروں بشمول پلاننگ کمیشن کے چیرمین جناب بی۔ونود کمار و دیگر سے فون پر گفتگو کی جس پر ان حکومتی ذمہ داران نے تیقن دیا کہ جلد ہی ٹی ایس پی ایس سی اور وائس چانسلرز کے عہدوں پر مسلمان امیداوار کا تقرر کیا جائیگا۔اور ان تیقنات کے بعد ہم امید کرتے ہیں کہ حکومت مسلمانوں کے ساتھ کسی بھی طرح کا امتیاز نہیں برتے گی اور سابقہ روایات کو برقرار رکھتے ہوئے انصاف کرے گی۔ امیرحلقہ،مولانا حامدمحمدخان نے چیف منسٹر کے سی آرسے مطالبہ کیا کہ وہ ان امور کا سختی سے نوٹ لیں اور اس ناانصافی کی نہ صرف فوری طور پر بھرپائی کریں بلکہ آئندہ ہونے والے کسی بھی تقررات کے عمل میں مسلمانوں کے ساتھ انصاف کو یقینی بنائیں۔

امیر حلقہ جماعت اسلامی ہند تلنگانہ مولانا حامد محمد خان نے آج اسلامک سوشیل سروس سوسائٹی،حیدرآباد کی جانب سے کووڈ نائنٹین کے ابتدائی متاثرین کے لئے خدمت خلق کے جذبہ کے تحت چلائے جانے والے آکسیجن تھراپی سنٹر وادی ھدی کا دورہ کرتے ہوئے یہاں کا تفصیلی معائنہ کیا۔

کارکردگی سے متعلق آگاہی حاصل کی اور یہاں شریک تمام مریضوں سے بات چیت کی اور انکی صحت سے متعلق دریافت کیا۔واضح رہے کہ مجوزہ مسلم جنرل ہاسپٹل وادی ھدی، پہاڑی شریف (احاطہ جامعہ دارالھدی) کی عمارت میں عارضی طور پر آکسیجن تھراپی سینٹر کا آغازعمل میں لایاگیا ہے، جہاں ابتدائی طورپر کووڈ متاثرین کا کامیابی کے ساتھ علاج کیا جارہاہے۔یہاں کووڈ کے ابتدائی مریضوں کے لئے دواؤں کے علاوہ ضروری طبی امداد کی سہولت مہیا کی گئی ہے اور مریضوں کے لئے کھانے کا بھی انتظام ہے۔ساتھ ہی ایمبولینس خدمات بھی موجود ہیں۔امیر حلقہ تلنگانہ مولانا حامد محمد خان نے دورہ کے موقع پر میڈیا سے بات کرتے ہوئے کہا کہ اس سینٹر میں ابتدائی علاج کے بعد کئی ایک مریض اللہ کے فضل و کرم سے شفاء یاب ہوکر ڈسچارج ہوچکے ہیں۔ انہوں نے کہا کہ مریضوں سے بات چیت سے بھی معلوم ہوا مریض اور انکے افرادِ خاندان علاج اوردواخانہ کی کارکردگی پر اطمینان کا اظہار کر رہے ہیں۔ مولانا حامد محمد خان نے یہاں کے ڈاکٹرس،نرسس،طبی عملہ کے علاوہ دیگر تمام منتظمین کا اس موقع پر شکریہ ادا کیا اور انکے حق میں دعائے خیر فرمائی کی کہ اللہ تعالی ان سب کی کوششوں کو مقبول بنائے کہ ان سب کی انتھک محنت اور جستجوکی وجہہ سے یہ ممکن ہوسکاہے۔اس موقع پر حافظ محمد رشاد الدین،سکریٹری اسلامک سوشیل اینڈ سروس سوسائٹی حیدرآباد کے علاوہ سینٹر کے ذمہ داران جناب یوسف علی خان،جناب عبدالرحیم خالد باوزیر،جناب عبد الماجد ذاکر،جناب سید تبریز بخشی ودیگر موجود تھے۔

امیرحلقہ حامدمحمدخان‘مولاناخالد سیف اللہ رحمانی، بیرسٹر اسد الدین اویسی، عرب صحافی عزام تمیمی،پروفیسر کودنڈا رام،جناب ضیاء الدین نیر،مفتی صادق محی الدین فہیم نظامی،مولانا سید نثار حسین حیدرآغا،مولانا سید تقی رضا عابدی، جناب عزیز پاشاہ‘محترمہ آسیہ تسنیم،ودیگر معزز علماء وقائدین کا ورچول خطاب

بسم اللہ الرحمن الرحیم

P R E S S N O T E

معصوم فلسطینیوں پر اسرائیلی جارحیت وانتہاپسندی کے خلاف صدائے احتجاج بلند کرنے جماعت اسلامی ہندحلقہ تلنگانہ کے زیر اہتمام کل جماعتی آن لائن احتجاجی جلسہ عام منعقد کیاگیا۔ سوشیل میڈیا کے ذریعہ منعقدہ اس پروگرام میں ہزارہا افراد نے شرکت کرتے ہوئے اسرائیلی ظلم وبربریت اور ارض فلسطین پر اسرائیل کے ناجائز تسلط کے خلاف اپنا احتجاج درج کروایا۔ صدر جلسہ مولانا حامد محمدخان، امیرحلقہ جماعت اسلامی ہند حلقہ تلنگانہ نے اپنے صدارتی خطاب میں کہا کہ اسرائیل،فلسطین سے اپنا ناجائز تسلط ختم کرے۔ انہوں نے کہا کہ دنیا کی ظالم صہیونی طاقتیں اور سازشیں یہ کاروائیاں انجام دے رہی ہیں۔ مولانا نے کہا کہ ہم فلسطین کے معصوم نہتے بھائیوں کے ساتھ ہیں اور فلسطینی نوجوانوں،بزرگوں،ماؤں اور بچوں کے ساتھ اظہاریگانگت کرتے ہیں۔ انہوں نے کہا کہ جنگ بندی کا اعلان توکیاگیا ہے لیکن ضرورت اس بات کی ہے کہ اسرائیل، فلسطین پر اپنا ناجائز قبضہ برخواست کرے۔ بیت المقدس میں لگائی گئی پابندیوں کو ہٹائے اور فلسطینیوں کو امن کے ساتھ رہنے دے۔ انہوں نے امت مسلمہ سے اپیل کی کہ وہ انفرادی طور پر جاگ جائیں، یہ وقت خواب غفلت میں پڑے رہنے کا نہیں ہے۔انچارج جنرل سکریٹری آل انڈیا مسلم پرسنل لاء بورڈ مولانا خالد سیف اللہ رحمانی نے اپنے خطاب میں کہا بیت المقدس کو آزاد کرانا ہم سب کی ملی اور شرعی ذمہ داری ہے۔مولانا نے کہا کہ مسلمان خود مسجد اقصیٰ کو بھول رہے ہیں۔ انہوں نے مسلم علماء سے اپیل کی کہ وہ خطابات جمعہ اوردیگر مواقعوں پر بیت المقدس(مسجد اقصیٰ) کی فضیلت سے ملت اسلامیہ کو واقف کروائیں۔ انہوں نے کہا کہ عالمی برادری پر بھی دباؤ بنایاجائے کہ وہ اسرائیلی جارحیت پرروک لگائے۔ مولانہ رحمانی نے کہا کہ ہم فلطسینیوں تک براہ راست نہیں پہنچ پاتے لیکن ایسے میں ہم اپنے جذبات پہنچا سکتے ہیں اور موجودہ جنگ بندی میں اس کا اثر بھی دیکھا گیا ہے۔ مولانا نے اسرائیلی مصنوعات کا بائیکاٹ کرنے اُمت مسلمہ اور انصاف پسند عوام سے اپیل کی۔رکن پارلیمنٹ حیدرآباد وصدر اے آئی ایم آئی ایم بیرسٹر اسد الدین اویسی نے اپنے خطاب میں کہا کہ صہیونیت کا وائرس اس وقت ساری دنیا کے لیے چیلینج بناہوا ہے۔ اسد اویسی نے کہا کہ مادی وعصری ہتھیاروں کے اعتبار سے اسرائیلی اور فلسطین کا کوئی مقابلہ نہیں ہے۔ بلکہ اسرائیل،فلسطینیوں کی نسل کشی کرنا چاہتا ہے۔ انہوں نے فلسطین کی زمین پراسرائیل کے غیرقانونی اور غیر اخلاقی وجود کو کالا دھبہ قراردیا۔ اسد اویسی نے کہا کہ ہم مسلمان کم از کم اپنی زبان،جذبات اور دُعاؤں سے فسلطینوں کا ساتھ دیں۔ اردن سے تعلق رکھنے والے معروف عرب صحافی، مصنف اورآہیوار بین الاقوامی ٹی وی چینل کے ایڈیٹران چیف جناب عزام تمیمی نے اپنے پرزور خطاب میں کہا کہ بیت المقدس قبلہ اول ہے یہ صرف دو پڑوسیوں اورکمینیٹیوں کا مسئلہ نہیں ہے بلکہ عالمی اور ملی مسئلہ ہے۔ انہوں نے کہا کہ یہ جنگ بندی کا واقعہ پہلا اور آخری واقعہ نہیں بلکہ فلسطین اور بیت المقدس کومکمل آزاد ہونا چاہئے اور ان شاء اللہ آزاد ہوگا۔ انہوں نے کہا کہ ایک طرف اسرائیل، امریکہ اور یورپ کی تائید سے مضبوط ہورہا ہے تو دوسری طرف مسلم عرب ممالک بھی اسرائیل کو مضبوط کرنے میں درپردہ کردار اداکررہے ہیں۔ عزام تمیمی نے کہا کہ یہ جنگ صہیونی طاقتوں کی جانب سے چھیڑی گئی ہے۔ یہ طاقتیں مسلمانوں کی زمینوں اور مساجد پرقبضہ کرنا چاہتی ہیں ہمیں متحد ہوکران کا مقابلہ کرنا ہوگا۔ جناب ضیاء الدین نیرصدر کل ہند مجلس تعمیر ملت نے کہا کہ اسرائیلی جارحیت کی جتنی بھی مذمت کی جائے کم ہے۔انہوں نے کہا کہ مسلمان ہرطرح کی ایثار وقربانی کے لیے تیار رہیں۔مولانا مفتی حافظ سید شاہ صادق محی الدین فہیم نظامی، مفتی دارالقضاء وافتاح نے کہا کہ فلسطینی بھائی اور بہنوں کا جذبہ اور عمل لائق تحسین وقابل تقلید ہے انہوں نے مسلم ممالک سے فلسطین کی مدد کے لیے آگے آنے کی اپیل کی۔ڈاکٹر سید نثارحسین حیدرآغا صدر کل ہند شیعہ علماء وذاکرین نے کہا کہ اسرائیل کی سفاکی پرخاموش رہنے والے بھی اس ظلم میں برابرکے ذمہ دار ہیں۔انہوں نے کہا کہ مسلمان دنیا کے کسی کونے میں رہیں سب آپس میں ایکدوسرے کے بھائی ہیں۔مولانا سیدتقی رضا عابدی کل ہند شیعہ ذاکرین نے اپنے خطاب میں کہا کہ جنگ بندی ایک طرح سے اسرائیل کی شکست ہے۔انہوں نے کہا کہ فلسطین اور حماس کو اس وقت مدد کی شدید ضرورت ہے اور عرب ممالک ودیگر انصاف پسند ممالک اسرائیل میں اپنی تجارت اورسرمایہ کاری بند کریں۔سابق رکن راجیہ سبھا جناب عزیز پاشاہ نے کہا کہ ہندوستان،اسرائیل سے اپنے سفارتی وتجارتی تعلقات ختم کرے اور اسرائیل کے غاصبانہ رویہ پرروک لگانے کے لیے دباؤبنائے۔ پروفیسر کودنڈا رام صدرٹی جے ایس نے کہا کہ فلسطینیوں کی حالت اپنے ہی ملک میں تارکین وطن کی طرح ہوچکی ہے اور اسرائیل ان کے بقیہ رہ گئے وسائل پر بھی قبضہ کرنا چاہتا ہے۔صدرجمعیت اہل حدیث تلنگانہ ڈاکٹرسیدآصف عمری نے کہا کہ فلسطین کی حمایت ہر صاحب ایمان اور انصاف پسند کی آواز ہونی چاہئے۔ انہوں نے سوشل میڈیا کے ذریعہ اسرائیلی ظلم کے خلاف احتجاج درج کرانے کی اپیل کی۔مفتی غیاث احمد رشادی چیرمین ممبرومحراب فاؤنڈیشن نے اپنے خطاب میں کہا کہ ہمیں قطعی طورپر اسرائیلی مصنوعات سے واقف ہوکران مصنوعات کا مکمل بائیکاٹ کرنا ہوگا۔محترمہ آسیہ تسنیم ریاستی ناظمہ شعبہ خواتین حلقہ تلنگانہ نے کہا کہ ظلم کو روکنے کے لیے آگے آنا انسانی ضمیرکی بیداری کی علامت ہے۔ جناب ملک معتصم خان مرکزی رکن شوریٰ جماعت اسلامی ہند نے کہا کہ ہندوستان اور یہاں کے انصاف پسند عوام نے ہمیشہ سے فلسطینی کاز کی تائیداوراسرائیلی غاصبانہ قبضہ کوسخت نا پسند کیا ہے۔ڈاکٹر طلحہ فیاض الدین صدرایس آئی او حلقہ تلنگانہ نے اس حدیث کا حوالہ دیا جس کا مفہوم یہ ہے کہ امت مسلمہ ایک جسم کی مانندہے کسی ایک حصہ کو تکلیف پہنچتی ہے تو دوسرا حصہ بھی بے چین ہوتا ہے۔ حافظ محمدرشاد الدین ناظم شہرگریٹر حیدرآبادنے اپنی افتتاحی کلمات میں کہا کہ اسرائیل ہرکچھ دنوں بعد معصوم فلسطینی آبادی پر بمباری کے ذریعہ بستیوں کو اُجاڑ رہا ہے اور نئی اسرائیلی کالونیاں قائم کررہا ہے۔ انہوں نے کہا کہ گریٹر اسرائیل کے قیام کاوہ ناپاک منصوبہ رکھتا ہے جسے عالم اسلام کے مسلمانوں بالخصوص مسلم عرب ممالک کوسمجھنے کی ضرورت ہے۔مولانا محمدحسام الدین ثانی جعفر پاشاہ، سی پی آئی سکریٹری جناب چاڈاوینکٹ ریڈی،ایس جیون کمار،جناب محمدعبدالعزیزصدر ایم پی جے،مولانا سید احمد ومیض ندوی اسلامک اسکالر،جناب محمدنصیرالدین،جناب محمدعبدالمجیدسکریٹریز حلقہ بھی اس پروگرام میں شریک رہے۔ڈاکٹرخالد مبشرالظفرنے پروگرام کی کاروائی چلائی،حافظ محمدمبین الدین کی تلاوت وترجمانی سے پروگرام کا آغاز ہوا۔

پریس سکریٹری