جامعہ دارالسلام، عمر آباد کے طلبا و اساتذہ کے وفد کا استقبال

جامعہ دارالسلام، عمر آباد کے طلبا و اساتذہ کے وفد کی جامعہ دارالھدی آمد ،  ناظم شہر جماعت اسلامی ہندحافظ محمد رشاد الدین نے وفد کا استقبال کیا
 
 
معروف دینی درسگاہ جامعہ دارالسلام، عمر آباد سے سال جاریہ فراغت و سند حاصل کرنے والے چالیس طلبہ اور اساتذہ کرام کے ایک وفد نے جامعہ دارالھدی، وادی ھدی ِپہاڑی شریف حیدرآباد کا دورہ کیااور تفصیلات سے آگاہی حاصل کی،اس موقع پر جامعہ دارلھدی پہاڑی شریف پر استقبالیہ تقریب کا انعقاد عمل میں آیا۔ ناظم شہر جماعت اسلامی ہند عظیم تر حیدرآبادحافظ محمد رشاد الدین نے وفد کا استقبال کیا۔ باہمی تعارف کے بعداس موقع پر انہوں نے جماعت اسلامی ہندکا تعارف اور کارکردگی اور وفاق العلماء تلنگانہ کی سرگرمیوں کے علاوہ جامعہ دارلھدی کی تعلیمی رپورٹ سے انہیں واقف کروایا۔استقبالیہ تقریب میں مولانا عبد الجبار عمری، مولانا شمس الضحی عمری، مولاناعبد الصمد عمری،مولانا محمد عرفان صدیقی فلاحی، جنرل سکریٹری وفاق العلماء، نائب صدر اسلامک سوشل سرویس سوسائٹی حیدرآباد جناب عبد الرحیم خالد باویز و دیگر نے شرکت کی۔پروگرام کی کارروائی مولانا عبد الصمد عمری نے چلائی اور کلمات تشکر مفتی محمد شوکت علی قاسمی نے پیش کئے،دعاء پرتقریب کا اختتام عمل میں آیا۔وفد نے جماعت،وفاق اور مدرسہ کی کارکردگی اور سرگرمیوں پر مسرت کا اظہار کرتے ہوئے نیک خواہشات پیش کیں۔
Read More

قرآن مجید سب کی کتاب ہے

قرآن کے پیغام اور نبی اکرم ﷺ کی تعلیمات سے برادران وطن کو واقف کروانے کی ضرورت پر زور
 
علماء اکرام کے اجلاس سے مولانا حامد محمد خان،مفتی تنطیم عالم قاسمی،مفتی محبوب شریف نظامی،مولانا شاہد قاسمی،مفتی سراج الہدی الازہری و دیگرکا اظہار خیال
 
اس وقت ساری انسانیت کو اسلام کے پیغام سے واقف کروانے کی ضرورت ہے۔ ہمیں چاہیے کہ برادران وطن سے دوستانہ روابط بڑھائیں‘اسلام اور مسلمانوں سے متعلق ان میں پائی جانے والی غلط فہمیوں کو دور کریں ان خیالات کا اظہار امیر حلقہ جماعت اسلامی ہند حلقہ تلنگانہ مولانا حامد محمد خان صاحب نے جماعت اسلامی ہند یاقوت پورہ کے زیر اہتمام علماء کرام و اکابرین ملت کے خصوصی مشاورتی اجلاس بعنوان”موجودہ حالات میں علماء کرام کی ذمہ داریاں“ کے موقع پر مسجد صالحہ قاسم ؒ بنڈلہ گوڑہ حیدرآباد میں کیا۔ سلسلہ خطاب جاری رکھتے ہوئے مولانا حامد محمد خان نے کہا کہ علماء کرام ستاروں کی مانند ہے‘ اگر علما ء کرام متحدہ طور پر کوشش کریں تو ملک و ملت کی قسمت بدل سکتی ہے۔ اُنہوں نے کہا کہ علماء کو متحدہونے کی ضرورت ہے۔ مولانا نے مسلمانوں کو ارتداد کے فتنہ سے چوکس اور چوکنا رہنے کا بھی مشورہ دیا۔ ساتھ ہی مساجد اور مکاتب کے ذریعہ تعلیم بالغان و بالغات کے پروگرام چلانے اور مسلم نوجوانوں کو دینی تعلیم سے آراستہ کرنے پر زور دیا۔ واضح رہے کہ تحفظ ایمان و شریعت‘ فرقہ پرستی و ظلم کے خلاف حکمت عملی‘ بین مذاہب شادیاں و مسلم نوجوان اور ارتداد اسباب و تدارک جیسے اہم اور نازک موضوعات و مسائل سے متعلق ایک خصوصی اجلاس منعقد کیا گیا تھا۔ جس میں تمام مسالک و مکاتب فکر کے جید علماء کرام و اکابرین ملت شریک تھے۔ اور سب ہی نے ایک آواز ہو کر متحدہ طور پر کام کرنے کا عزم ظاہر کیا۔ مولانا مفتی تنظیم عالم قاسمی‘ استاذ حدیث دارالعلوم سبیل السلام نے اس موقع پر کہا کہ ہم حالات سے مایوس نہ ہوں بلکہ مسلسل جد و جہد کے ذریعہ حالات تبدیل کیے جاسکتے ہیں۔ مولانا نے کہا کہ ہر عالم‘ داعی بنے اُنہو ں نے مزید کہا کہ جمعہ کے موقع پر دیے جانے والے اُردو خطبات میں سماجی موضوعات کو شامل کریں تا کہ قوم و ملت کی بروقت رہنمائی ہو سکے۔ مولانا تنظیم عالم قاسمی صاحب نے علماء کرام سے اپیل کی کہ جماعت اسلامی ہند کی جانب سے قائم کی گئی تنظیم وفاق العلماء تلنگانہ جو مختلف مکاتب فکر کے علماء کرام کا متحدہ پلیٹ فارم ہے کو مضبوط کیا جائے۔مولانا شاہد قاسمی استاذ و ناظم تعلیمات المعہد العالی الاسلامی نے اس موقع پر کہا کہ ہمیں چاہیے کہ آپس میں ایک دوسرے کا احترام کریں اور ہر کام کا احترام ہو۔ مولانا ظہیر صادق حسامی نے کہا کہ ہم بچوں کے لئے نمونہ بنیں اور گھر و ں میں مثالی اسلامی ماحول پروان چڑھائیں۔جناب ایم۔ این بیگ زاہد سکریٹری شعبہ اسلامی معاشرہ نے کہا کہ وفاق العلماء تلنگانہ کا مقصد اعلاء کلمتہ اللہ امر بالمعروف اور نہی عن المنکر کے لئے اجتماعی جدو جہد کرناہے۔اُنہوں نے علماء کرام سے وفاق العلماء میں شامل ہونے کی اپیل کی۔مفتی مقیم الدین سبیلی نے کہا کہ مساجد میں قائم مدارس و مکاتب سے بچوں کو قریب کیا جائے۔مولانا انس ندوی  نے کہا کہ قرآن مجید سب کی کتاب ہے اور اس کی تعلیمات سب کے لئے ہیں۔ مولانا مفتی محبوب شریف نظامی صدر وفاق العلماء عظیم تر حیدرآباد‘ مولانا مفتی سراج الہدیٰ ندوی الازہر(سبیل السلام)‘ مولانا مفتی عمر عبدالقوی‘ مولانا یوسف خان‘ مولانا سید توفیق (جامعۃ الطاہرات)‘ ناظم شہر جماعت اسلامی ہند حیدرآباد حافظ محمد رشاد الدین‘ جناب محمد عماد الدین‘ جناب محمد عمران امرائے مقامی یاقوت پورہ وبہادرپورہ واراکین شوریٰ یاقوت پورہ ودیگر معزز و قابل احترام علماء کرام کی کثیر تعداد اس موقع پر موجود تھی۔ محترم حافظ و قاری عمران بن ہاشم العبیس خطیب مسجد صالحین کی تلاوت کلام پاک سے اجلاس کا آغاز ہوا۔ جناب محمد عبدالحفیظ اسلامی ناظم رابطہ برائے علماء کرام و مدارس اسلامیہ یاقوت پورہ نے افتتاحی کلمات پیش کیے۔ مولانا مفتی محبوب شریف نظامی صاحب کی دعاء پر اجلاس کا اختتام عمل میں آیا۔ مفتی محمد عبدالفتاح عادل سبیلی امام و خطیب مسجد حفیظیہ نے پروگرام کی نظامت کی۔      
 
 بتاریخ:31،اکتوبر،2021
Read More

 جی آئی او، تلنگانہ کی (برائی مٹاو مہم) ‘ ‘نہی عن المنکر ”، وقت کی اہم ضرورت پر منعقدہ راؤنڈ ٹیبلاجلاس سے خواتین دانشوران کا اظہار خیال

پریس نوٹ

 
معاشرے سے برائیوں کے سد باب کے پیش نظر گرلز اسلامک آرگنائزیشن تلنگانہ کی جانب سے چودہ روزہ ریاست گیر مہم”نہی عن المنکر”(برائی مٹاو مہم) چلائی جارہے۔ اس ضمن میں ایک راؤنڈ ٹیبل میٹ اسلامک سنٹر لکڑ کوٹ چھتہ بازار حیدرآباد پر منعقد ہوئی۔اس اجلاس میں مختلف خواتین تنظیموں کے نمائندے شریک ہوئے اور معاشرے میں بڑھتی ہوئی برائیوں پر تشویش کا اظہار کیا اور ان کی رو ک  تھام کے لئے سبھی کو مل کراقدامات کرنے پرزور دیا۔ بہن رمیسہ فاطمہ ریاستی صدر، جی آئی او تلنگانہ اور بہن ام مہیمن صائمہ،جنرل سکریٹری جی آئی او تلنگانہ نے معاشرے سے برائیوں سے کے ازالہ اور نیکیوں کے فروغ کے ضمن میں جی آئی او کی کوششوں کو پیش کیا،اسکے علاوہ مہم کے اغراض و مقاصدبھی پیش کئے۔تمام شرکا نے  اس مہم کو وقت کی ضرورت قرار دیا۔اور ہر طرح کے تعاون کا پیشکش کیا۔اس اہم اجلاس کو مختلف مکاتب فکر،تنظیموں اور مختلف شعبہ حیات سے تعلق رکھنے والی ذمہ دارخواتین نے مخاطب کیا۔محترمہ آسیہ تسنیم، ریاستی ناظمہ جماعت اسلامی ہند حلقہ تلنگانہ، محترمہ عقیلہ خموشی صدر تنظم بنت حرم، رکن آل انڈیا مسلم پرسنل لاء بورڈ،ایڈوکیٹ جلیسا یاسین، تفہیم الشرعیہ کمیٹی،ایڈووکیٹ قدوسہ، تفہیم الشرعیہ کمیٹی، محترمہ ا م عمارہ عالیہ ہیومنیٹیرین فاؤنڈیشن، محترمہ عظیمہ تبسم، انڈرسٹانڈ قرآن اکیڈمی،  محترمہ ہمیرا،سوشیو ریفارم سوسائٹی، محترمہ مبین فاطمہ، فاطمہ اولڈ ایج ہوم، محترمہ نورجہاں، ہیلپ حیدرآباد،محترمہ اسماء زرزری، معاون ناظمہ،عرشیہ مدثر شعبہ خواتین، بہن منزہ،بہن سارہ، زونل ایڈوائزری کونسل ممبرز جی آئی او تلنگانہ و دیگر نے اجلاس میں شرکت کی۔
Read More

عید قرباں اللہ تعالی کی اطاعت و فرما نبرداری میں یکسوئی کا درس دیتی ہے

عید قرباں اللہ تعالی کی اطاعت و فرما نبرداری میں یکسوئی کا درس دیتی ہے۔
امیر حلقہ جماعت اسلامی ہند حلقہ تلنگانہ مولانا حامد محمد خان کی جانب سے عامتہ المسلمین کو عید الاضحی کی مبارکباد

 

مولانا حامد محمد خان امیر حلقہ جماعت اسلامی ہندحلقہ تلنگانہ نے عید الاضحی کے موقع پر عامتہ المسلمین کو عید قرباں کی پر خلوص مبارکباد دیتے ہوئے کہا کہ عید قرباں محض جانور کی قربانی کا نام نہیں ہے بلکہ اللہ تعالیٰ کی اطاعت و بندگی میں حضرت ابراہیم ؑ و حضرت اسمٰعیل ؑ کی یکسوئی اور سرِ تسلیم خم کرنے کی سنت کی تجدید کا پیغام ہے۔عید قرباں یہ درس دیتی ہے کہ اہل ایمان کے لئے اللہ کے احکام کی اطاعت و پیروی دنیا و مافیھا سے بہتر اور افضل ہے۔ عید قرباں کے موقع پر صاحب استطاعت افراد کے لئے قربانی کرنا تو واجب ہے لیکن تمام اہل ایمان کے لئے لازم ہے کہ وہ اس بات کا عہد کریں کہ ان کی آنے والی ساری زندگی اور زندگی کے سارے افعال و اعمال صرف اور صرف اللہ کی اطاعت و بندگی میں بسر ہو نگے اور وہ اللہ کی اطاعت اور اللہ کی بندگی کے لئے ا پنے جان مال و نفسانی خواہشات کو قربان کردیں گے۔ مولانا حامد محمد خان نے عامتہ المسلمین سے اپیل کی کہ وہ عید کے موقع پر قربانی کرتے ہوئے اس بات کو یاد رکھیں کہ اسلام نے پاکی و صفائی کو نصف ایمان قرار دیا ہے اور اپنی خوشیوں میں برادران وطن کو بھی حتی الوسع شامل رکھنے کی کوشش کریں۔

میڈیا اینڈآئی ٹی ڈپارٹمنٹ
جماعت اسلامی ہند تلنگانہ

Read More

کووڈ پروٹوکول کے ساتھ عبادت گاہوں کی کشادگی کا مطالبہ

کووڈ پروٹوکول کے ساتھ عبادت گاہوں کی کشادگی کا مطالبہ : امیرحلقہ مولانا حامدمحمدخان

امیرحلقہ جماعت اسلامی ہند حلقہ تلنگانہ مولانا حامدمحمدخان نے اپنے صحافتی بیان کے ذریعہ حکومت سے فوری طور پر ریاست میں مساجد کی کشادگی کا مطالبہ کیا۔ انہوں نے کہا کہ کووڈ 19- کے بڑھتے ہوئے معاملات کے پیش نظرحکومت نے محکمہ صحت کی سفارشات کی بنیاد پرابتداء میں 4گھنٹے صبح (6تا10بجے)دن نرمی کے ساتھ لاک ڈاؤن نافذ کیا۔بعدمیں اسے ایک بجے تک بڑھایاگیا اور اب صبح 6بجے تا شام5بجے تک لاک ڈاؤن کے اوقات میں نرمی دی گئی ہے اور شام 6بجے تاصبح6بجے تک لاک ڈاؤن جاری ہے۔ انہوں نے کہا کہ اب جبکہ صبح 6تاشام5بجے نرمی کے اوقات میں تقریباً تمام ہی تجارتی ادارے، دفاتر حتیٰ کہ شراب خانے بھی کھلے رکھنے کی اجازت ہے لیکن مساجدمیں مصلیوں کی محدود تعدادمیں داخلہ کی اجازت دی گئی ہے۔ موجودہ حالات میں کووڈ پروٹوکول،ماسک،سینیٹائزر،طبعی دوری کی برقراری کے ساتھ مساجد میں نماز کی اجازت فوری طور پر دی جائے۔ مولانا حامدمحمدخان نے حکومت وانتظامیہ سے مطالبہ کیا کہ کووڈ پروٹوکول کی پابندی کے ساتھ مساجد کی فوری اثر کے ساتھ مکمل کشادگی عمل میں لائیں۔اس موقع پر عوام الناس سے بھی اپیل کی کہ وہ کووڈ قواعد کی پابندی کریں۔

جاری کردہ : شعبہ میڈیا ، جماعت اسلامی ہند،تلنگانہ

Read More